ليهم

نعرف كي يطوال ليل المظلوم يجبد سيقارو ويلعن النوم وراسو الكاسح ويتفكر صوت يجيه مع قهوة الصباح : وليدي رد بالك على روحك ...يتبسّم ويقلها سامحنى امى ما انجمش نمشي الحيط الحيط نخاف يطيح عليّ ، نحبّ نشّق الكيّاس هامتي ممدوده للشمس وللريح ، وجبيني عالي للسماء لا نخاف من سبّان ولا من عصا ، وليدي ردّ بالك على روحك ....يتبسّم ويقلّها سامحنى أمّي تعرفني ما انحبّش نمشي في الضلّ لا يركبني الذّل ويفضحنى خيالي المكسور ، نحب نمشي في النور ونصنع بأفكاري جنة غدوة للخدّامة ، للبطالة، ، للطلبة ، للبوليسية ، للساهرين على راحتنا وللي يتفرجو على ذبيحتنا ، وليدي ردّ بالك على روحك : .... سامحنى يا أمّي ما انّجمش نقص لساني ونعمل كي أندادي نبقى لتالي نتفرّج في البهجة والفرح الدائم نخاف نموت بالغصّة وما نقولش لا آى ولا يزّي نكره وجهي اللى نراه في المراية ونولي هارب منّي ، وليدي ردّ بالك على روحك : سامحني امّي ما انجمش نعيش في الظلمة ونعمي عيني بيدي نحب نرى الدنيا وتعلمت منك كي نرى العوج ما نحملوش تعلّمت نعرّي الهم المتغطي بجرتيله ونقلو اللى لازمو يتقال سامحني امى ما انجمش نعمل وذن عروس ونهني ونبوس في اللي يشرب في دموماتنا ويقطع في الروس سامحنى امي وما تبكيش غيبتي ماهيش باش اطّول وأعرف انو غدوة لينا مهما حطوا الحديد في يدينا

كاتب مجهول